طريقة عمل سمك السنجاري
المقادير السمك السنجاري
هنحتاج سمك بوري مفتوح سنجاري
التتبيلة (توم - ملح - كمون - كزبره مش مطحونة اووي - فلفل الوان - فلفل حامي- ليمون - معلقة خل - زيت عادي او زيت زيتون)
للصنيه هنحتاج (بطاطس حلقات رفيعة - فلفل الوان- فلفل حامي- وبصل حلقات- وشرائح ليمون- طماطم)
مقادير كريمة الليمون
معلقة من تتبيله السمك ومعلقة زيت ومعلقة مسترده ورشة ملح خفيفة وكزبرة ناشفه وكريمة تقريبا كوب إلا ربع وشبت مفروم وليمونه.
طريقة عمل سمك السنجاري
- هنغسل السمك كويس بدقيق وملح وليمون ونفتحه كويس ونشيل السلسلة اللي ف نص السمك ونشيل الراس كمان.
- ف الكبة هنفرم التوم والفلفل العادي والحامي ومعلقة خل.
- هاتي صنيه ورصي البطاطس والفلفل الحامي والألوان والطماطم والليمون ورشي عليهم رشة ملح وكمون وكزبرة ومعلقتين توم مفروم مع الفلفل ورشة زيت زيتون او زيت عادي ونقلب كله مع بعض.
- رصي السمك علي الخضار وحطي معلقتين كبار من التتبيلة ع كل سمكه ووزعيها كويس علي السمك.
- ورشي رشة ملح كويسه ورشة كمون ورشة كزبره واعصري ليمون علي كل سمكه.
- ووزعي فلفل حامي وعادي وحلقات بصل علي السمك من فوق.
- وفي الاخر انزلي برشة زيت زيتون او عادي علي السمك كله.
- دخلي السمك بقا الفرن لمده ٢٥ دقيقه تقريبا هتلاقي الشوكة بتدخل بسهوله جدا ف السمك ولون اللحم بقا ابيض وطري.
- افتحي الشواية واقفلي الفرن وتحطي السنيه قريبه من الشواية شويه مش لازقه فيها ولا بعيده اووي عشان تاخد لون وحروف السمك تقرمش وتبقا جميله ولون السمك يفتح النفس زي الصورة كده.
طريقه عمل كريمة الليمون
في قدرا انزلي بمعلقة زيت زيتون او زيت عادي ومعلقة زبده وانزلي بمعلقة من تتبيلة السمك وشوحيها شويه تدبل وبعد كده انزلي بالكريمة تغلي وتتقل ومعلقة مسترده وقلبي واعصري ليمونه ورشي ملح خفيف اووي عشان الكريمة مش بتحب الملح وبيبان فيها بقوه وانزلي برشه كزبره.
الكريمة تقلت اقفلي النار وانزلي بشويه شبت وقلبي ودوقي وظبطي الطعم ممكن تحتاجي لتوم أو مسترده وليمون ظبطيها حسب زوقك الخاص وتقدم بجوار السمك.