اللازانيا باللحمة المفرومة والبشاميل
اللازانيا من الأطباق الإيطالية الشهيرة ذات طعم رائع ومميز ، وهناك الكثير من أنواع اللازانيا المتنوعة ، من أشهر أنواع اللازانيا هي لازانيا اللحم ، وسوف أقدم لكم طريقة عمل اللازانيا باللحمة المفرومة والبشاميل بطريقه سهله.
مقادير اللازانيا باللحمة المفرومة والبشاميل
- باكيت لازانيا ٤٠٠ جرام.
- ٧٥٠ جرام لحمه مفرومه.
- ٢ بصله كبيره مفرومه.
- فصين توم مفروم ناعم.
- ٣ معالق كبار زبده.
- معلقه كبيره بقدونس مفروم.
- معلقه كبيره زعتر مجفف.
- ملح وفلفل اسود حسب الرغبه.
- نص كيلو طماطم مقشره ومفرومه.
- معلقتين كبار معجون طماطم.
مقادير البشاميل
- معلقتين كبار زبده.
- ملح وفلفل اسود حسب الرغبة.
- ٤ معالق كبار دقيق.
- ٢ كوب حليب.
- نص كوب جبنه موتزاريلا.
طريقة عمل اللحمة المفرومة
- في طاسه علي النار نضيف الزبدة وننزل بالبصل ونقلبه كويس لحد ما يدبل.
- نضيف اللحم المفروم والثوم للبصل ونقلب لحد ما اللحمة تستوي.
- نضيف البقدونس والزعتر المجفف ثم الطماطم المفرومة ونقلب كويس ونتبل بالملح والفلفل الأسود مع التقليب نغطي الطاسة ونسيبها علي نار متوسطة شويه لحد ما المكونات تتجانس.
طريقة عمل البشاميل
- في حله علي النار نضيف الزبدة وننزل بالدقيق ونقلب لمده دقيقتين.
- نضيف الحليب السائل مع التقليب المستمر لحد ما القوام يتقل.
- نضيف الملح والفلفل الأسود والجبنة الموتزاريلا مع الاستمرار في التقليب بعدين نرفعه من علي النار ونسيبه علي جنب.
طريقة عمل اللازانيا باللحمة المفرومة والبشاميل
- نسلق اللازانيا نص سوا في ماء مملح مضاف إليه معلقتين زيت وبعدين نطلعها في مياه بارده بمكعبات تلج عشان اللازانيا متلزقش مع بعضها.
- نجيب صنيه وندهنها بشاميل بسيط وفوقها طبقه من اللازانيا ونضيف طبقه من اللحمة المفرومة نكرر طبقه بشاميل علي اللحمة ونغطيها بطبقه من اللازانيا ثم نضيف طبقه بشاميل علي اللازانيا ونضيف الجبنة الموتزاريلا علي الوش.
- ندخل الصينية فرن ساخن علي درجه حراره ٢٠٠ لمده ٢٠ دقيقه لحد ما اللون يبقا دهبي.
ملحوظه: سلق اللازانيا بيكون شريحه أو اتنين ونستخدم معلقه خشب للتقليب ، وفيه أنواع لازانيا مش بتحتاج سلق وبنستعملها علي طول.